మిగిలున్నది చాలా కొంచెం...

బాల్యమంతా ఆటపాటల సందళ్ళు
యవ్వనంలో కలల కౌగిట బందీలు
ఆయువు తీరేనాటికి అనుతాప శోకాలు
తెలియనేలేదు ఎలా కరిగిపోయాయో రోజులు

ఎండమావి నీరుకోసం ఏళ్ళతరబడి ప్రయాణాలు
మలిసంధ్య చీకట్లో మసకబారిన చరిత్రలు
గడిచిపోయిన గతంలో గానరావు గనమైన గడియలు
నెమరేసుకుంటే మిగిలేది నైమిశ నిస్పృహలు

పక్కవాని కష్టం పంచుకో నేస్తం
కరిగిపోయే హిమ ఖండము నీ జీవితం
చక్కనైన చెలిమికి చాలు చిరుమందహాసం
నిరాశా జీవికి నీ ప్రియమైన పలుకే అభయ హస్తం

మరలిరాని లోకాలకు పయనమయ్యే జీవితాలు
మరో అవకాశం కోసం పరితపించే ప్రాణాలు
సమయాన్ని గౌరవించు నేస్తం...
ఇక మిగిలున్నది చాలా కొంచెం...