చావునెదిరించే చేవ లేకపోయినా....

మాట నేర్చిన మనిషి జాతి వివక్షతతో దిగజారి పోతూంటే
మానవత్వాన్ని మరచి మారణహోమం సాగిస్తూంటే
మలిన ఆలోచనలతో సాటి మనిషినే మట్టుబెడుతూంటే
మదిర మైకంలో వావివరసలే మరచిపోతూంటే

మాటలు రాని మృగం పాఠాలు చెబుతోంది
మనకన్నా తనే నయమని
          తనను మనతో పోల్చవద్దని
పరజాతి ప్రాణినిసైతం అక్కునజేర్చుకుంటోంది
తనువు శాశ్వతం కాదని
           తామసాన్నిక దరిజేరనివ్వనని

జవసత్వాలుడిగినా నీ జాత్యహంకారం చావదేమిటి
చరిత్రలెన్ని చదివినా మతచాందసం మానవెందుకు
చావునెదిరించే చేవ లేకపోయినా చంపాలన్న తపనెందుకు
చివరి నిమిషం వరకు చిత్తమంతా విత్తమే ఎందుకు...