ఆనంద లాహిరి

నీ చెలిమి కనుమరుగైతే గమనమెలా నేస్తం...
గుర్తులేదా మన విహంగ విహార  ఆనంద లాహిరి
నిమీలికా నేత్రాల మౌన సంభాషణాఝరి...
నెలవంక సాక్షిగా నీవు చేసిన బాసల విరి

నీ కళ్ళల్లో కనిపించే చిరు నవ్వులే  
దివి విరితోటలోని సిరి మల్లెల పలకరింపులు నాకు.
నీ గల గల మాటల వడి సెలఏరు
మలినమెరుగని మానససరోవరం నాకు... 


మాటవినని మనసును మరలించేదెలా...
మరువలేని నీ జ్ఞాపకాలను తుడిచేసేదెలా...
ప్రకృతే నీవైనప్పుడు నీకు దూరమయ్యేదెలా... 
ప్రవచిత ప్రమాణాలన్ని నీటిమూటలనుకునేదెలా...


గతితప్పిన నీ కఠిన హృది కాస్తైనా కరుగదా
గగనపు అంచులపైకెగసే ఆ మధుర క్షణం తిరిగిరాదా... 
విరిగిన మనసుకు విపణి వీధిలో వెలకడతావా నేస్తం...  
 అనురాగ విలువలను మరచి  వెలివేస్తావా నేస్తం...