నీ ఒడిలో పసిపాపనై..

గల గల మాటల నీ ఒరవడి
నేల  చేరిన చినుకు చేసే సవ్వడంతమధురం...
గాలి పొరలలో తేలిపోయే జలతుంపర తాకిన అనుభవం...
సెలఏటి అలల శ్రావ్య గీతం...

నీకంటి కాటుకనై కలల లోకాన్ని ఏలుకోనా..
కురుల తెరల చాటున విరినై ఒదిగిపోనా..
నీ చూపుల కెలవులో కలిసిపోయి కాలాన్ని మరచిపోనా
సౌందర్య సాగర లాహిరిలో కడదాకా తేలియాడనా..

కరిగిపోనా వాలిన నీ కనురెప్పల బిడియాన్నై
కవ్వించనా కెంపైన మోవిపై మిసిమి దరహాసాన్నై
కలహించనా నీ ముగ్ధ మనోహర రూపాన్ని చూపే అద్దాన్నై...
కనుమూయనా వలపుల నీ ఒడిలో పసిపాపనై...